ЖАҢА ЖИНАҚТЫҢ ТҰСАУЫ КЕСІЛДІ

1-наурыз «Алғыс айту» күні мерекесіне орай Жамбыл облысы мемлекеттік архиві архивтік құжаттар негізінде «Жамбыл облысындағы балалар үйі. 1920-1960 ж.ж.» атты жинақтың тұсаукесерін өткізді.

Өткен тарихты бағамдасақ, ХХ ғасырдың бастапқы жылдары қазақ жері үшін алапат оқиғалармен бетпе-бет келуіне тура келді. 1917 жылдың соңына таман орын алған мемлекеттік төңкөріс тарих бетіне коммунисттік қоғамды тарих сахнасына алып шықты. Одан бұйығы жатқан қазақ қоғамда шет қала алған жоқ. Алып империяның бір пұшпағы болып саналатын Қазақстан осы жойқын өзгерістерді бастан кеше отырып бұрын соңды болмаған ауыртпалықтармен бетпе бет келді.

20-шы жылдары басталған ашаршылық халықтың тоз-тозын шығарып, 30-шы жылдардың ортасына дейін созылды. Шаңырағы күйреп ортасына түскен қазақ отбасылардың балалары жетім қалып, қоғамның панасыз балалар үйі дейтін үйін паналады. Бұл жинақта да Жамбыл облысының аумағында Жамбыл қаласындағы №1, 2 Мойынқұм, Гродеково, Ново-Ивановка, Ақыртөбе, Калачаев, Серафимов балалар үйінің 1930 – 1960 жылдар аралығындағы жағдайы, жүргізілген жұмыстар балалар үйіне өткізілген жетім балдардың тізімдері, өкілетті органдардың қаулылары, шешімдері жарық көрген. Жинақта құжаттар түпкі мағынасы мен емілелерін сақтау үшін архивтік құжатта қалай жазылды сол қалпында беруді жөн көрдік.

Іс-шараға «Дулатитану және Өңір тарихы» ғылыми-зерттеу орталығының директоры, тарих ғылымдарының кандидаты, профессор Бақторазов Сейдахан Уәлиұлы, «Тарихи-мәдени ескерткіштерді қорғау және қалпына келтіру дирекциясы» қызметкері Сәния Мекемтасқызы, М.Х.Дулати атындағы Тараз өңірлік университетінің «Тарих» мамандығының 2-курс студенттері қатысты.

Шара соңында келген қонақтар мен білімгерлерге «Жамбыл жеріне эвакуацияланған өзге ұлт өкілдері» атты тақырыпта архив құжаттарына негізделген көрмені бөлім басшысы С.Зейнуллаұлы таныстырды.